Pakistani ka ndërmend të lirojë nga burgu të gjithë anëtarët e lëvizjes radikale "Taleban", duke përfshirë edhe ish-zëvendësliderin e talebanëve, Mullah Abdul Ghani Baradar, me synim arritjen e pajtimit kombëtar në Afganistan, deklaroi të premten Përfaqësuesi zyrtar i Ministrisë së Punëve të Jashtme të Pakistanit, Jalil Jilani, i cili aktualisht ndodhet për një vizitë zyrtare në kryeqytetin e Emirateve të Bashkuara Arabe, Abu Dhabi.

Pakistani filloi të lirojë nga burgu talebanët në nëntor të vitit të kaluar me kërkesën e autoriteteve afgane, të cilat shpresojnë se anëtarët e liruar nga burgu të lëvizjes radikale do të nxisin procesin e fillimit të negociatave të paqes. Opozita e ligjshme afgane beson se lirimi i militantëve do të jetë në favor të opozitës së armatosur.